Kineski svemirski brod sa uzorcima u Mjesečevoj orbiti

Kineski svemirski brod sa uzorcima u Mjesečevoj orbiti

Kineski svemirski brod kruži danas oko Mjeseca tokom priprema za povratak kući sa uzorcima uzetim sa površine Zemljinog satelita, što je prva takva misija poslije 45 godina.

Modul broda “Čange 5” prebacio je kontejner sa dva kilograma uzoraka nakon što se spojio sa robotizovanom letjelicom, a potom se odvojio.

Orbiter i kapsula za ponovni ulazak u Zemljinu atmosferu obići će još jedan krug oko Mjeseca da bi se otvorio “prozor” za povratak na našu planetu udaljenu 383.000 kilometara.

Letjelica će se prvo jednom odbiti od naše atmosfere da bi usporila, a potom će krenuti u spuštanje uz pomoć padobrana. Planirano je da se spusti u Mongoliji, prenio je AP.

Ukoliko misija bude uspješna, Kina će postati tek treća zemlja koja je donijela na Zemlju stijene sa Mjeseca, poslije SAD i Sovjetskog Saveza.

To će biti prvi svježi lunarni uzorci poslije sovjetske misije “Luna” 1976. godine.